ГУЫМИРЫТÆ

«Хуыцау дуне куы сфæлдыста, уæд адæмы скодта, – амынд ис ахуыргонд Биазырты Алыксандры арæзт чиныг «Нарты таурæгътæ æмæ хабæрттæ»-йы таурæгъ «Гуымирытæ, уæйгуытæ, Нартæ»-йы. – Хуыцауы уынаффæмæ гæсгæ зæххыл равзæрдысты Уадмиртæ. Уыдон уыдысты ставд æмæ тыхджын адæм: кæмтты цæугæ нæ кодтой, зæххæн та уæззау уыдысты. Æртæ фондзыссæдз азы куы рацыд Уадмирты равзæрынæй, уæд Хуыцау сфæлдыста Къамбадаты: зондæй дæр, тыхæй дæр Уадмирты хуызæн, фæлæ асæй та – къаннæгдæр, раст ныры дæсаздзыд сывæллоны йас. Къамбадатæ æгæр чысыл разындысты зæххыл цæрынæн. Æртæ фондзыссæдз азы куы рацыд уыдон сфæлдисынæй, уæд та Хуыцау скодта Гамериты, фæлæ та уыдон дæр æгæр стыр разындысты асæй дæр æмæ тыхæй дæр. Æртæ фондзыссæдз азы та куы рацыд Гамериты сфæлдисынæй, уæд та Хуыцау скодта Гуымирыты. Уыдон дæр зæххы аккаг нæ фесты. Æртæ фондзыссæдз азы куы рацыд Гуымирыты сфæлдисынæй, уæд та Хуыцау сфæлдыста Уæйгуыты. Уыдон дæр ын дзæбæх нæ фæрæстмæ сты, æгæр стыр разындысты».

Хуыцау ацы таурæгъмæ гæсгæ æртæ фондзыссæдз азы фæстæ та сфæлдыста Нарты, æмæ йын уыдон фæрæстмæ сты, уыдоны байзæддаг та сты ирон адæм.

Гуымирытæ уыдысты стыр тыхджын æдылы адæм. Артæй сæхи фæстæмæ аласын дæр нæ зыдтой, æмæ-иу сæ ныхтæ бамбæрзтой къæйдур кæнæ фæйнæгæй. Иухатт, федтой, куыдз арты фарсмæ хуыссыди æмæ куыд тæвддæр кодта, афтæ æддæдæр йæхи ласта. Уымæ гæсгæ Гуымирытæ базыдтой артæй сæхи хъахъхъæнын.

кæс «АРВЫ ДУАР»-Ы СÆРГÆНДТÆ